Верховный Хурал (парламент) Республики Тыва

Официальный сайт search.png   vkontakte   facebook   twitter

Тывада «Тоол театры» деп чогаадыкчы төлевилел боттанып эгелээн

31 октября 2022 - 17:59

Тыва дыл хүнүнүң бүдүүзүнде, октябрьның 31-де, Кызылга «Тоол театры» деп төлевилелдиң ажыдыышкыны болган. Ону шии болгаш театр уран чүүлүнүң талазы-биле «Тенгэр Театр» хөй-ниити организациязы биле Тываның национал театры организастап эрттирген.

Шии өргээзиниң баарында тиккен өгге эрткен байырлыг ёзулалга ТР-ниң Дээди Хуралының (парламентизиниң) Даргазы Каң-оол Даваа эртемденнер болгаш артистер-биле киришкеш, чараш төлевилелдиң киржикчилеринге байыр чедирген. Ол тоолдар ыдыкчызы Начын Салчакты дыңнааш, бо онза салым-чаяан-биле үе-чергези сургуулдарны ыяап таныштырар болза эки деп саналдаан. Дарга тоол ыдыкчылары кожуун бүрүзүнге турган болза деп бодалын база илереткен.

«Бо ажылдарны боттандырары амыр эвес. Ынчалза-даа силерниң быжыг сорууңар, изиг күзелиңер турда, сүлде-сүзүүңер бедик чорда, чүү-даа шаптык болбас.

ЮНЕСКО-нуң шугуму-биле «Хунан-Кара» деп тыва тоолду саха (якут) дылда бо чылын үндүрген. Келир неделяда Кызылга ооң таныштырылгазы эрттер. Россияның чоннарының тоолдарын удур-дедир очулдурар, хөй аймак чоннарга оларга таныштырар улуг төлевилелдиң автору Александр Жирков база Тывага ынчан аалдап кээп киржир.

Тываның эртемденнер болгаш чогаалчылар саха (якут) чоннуң маадырлыг тоолун база тыва дылче очулдуруп турар. Бир эвес «Тоол театры» кажан-бир шагда саха чоннуң тыва дылда тоолун бо оран-савага ыда бээр болза, ийи ха-дуңма чоннар аразында культурлуг солун болуушкун болур» - деп Каң-оол Даваа чугаалааш, чаа төлевилелдиң авторларынга чедиишкиннерни күзээн.


Возврат к списку