Кан-оол Даваа Будда Шакьямуни бурганның овур-хевирин мөңгежиткен ёзулалга киришкен
Бөгүн, ноябрьның 7-де, Таңды кожууннуң Суг-Бажы суурда Будда-парк сесерлиинге паранирванаже чаларап чоруткан Будда Шакьямуни бурганның овур-хевирин мөңгежидип тургускан.
Байырлыг ёзулалга ТР-ниң Дээди Хуралының (парламентизиниң) Даргазы Кан-оол Даваа, ТР-ниң Камбы-Ламазы Гелек Нацык-Доржу, Тибеттен келген лама-башкылар, Таңды кожууннуң болгаш Кочетов суурнуң удуртукчулары, чүдүкчүлер киришкен.
Кан-оол Даваага сөс бээрге, чүнүң-даа мурнунда ТР-ниң Баштыңының даалгазы-биле чыылган чонга байыр чедирген. Суг-Бажы суурда шажын-сүзүк талазы-биле улуг болуушкун болуп турарын онзалап демдеглээш, мындыг тускай шажынчы сесерлик республикада хамаанчок, Россияда чок деп чугаалаан. Ол Ыдыктыг Улуг Башкы, Чырыткылыг XIV Далай-Лама 1992 чылда Тывага чораанының соонда, буддизмниң өөредилгези республикада күштелгенин, оон бээр хөй янзы ажылдар кылдынганын демдеглээн. Будда бурганның паранирванаже чаларап чоруткан овур-хевирин бо шажынчы сесерликке мөңгежидип тургаш, ажы-төлүвүске, ал-бодувуска болгаш чуртувустуң келир үезинге эки буян-кежикти бодарадып турар бис дээрзин сагындырган.
Суг-Бажы суурнуң Будда-парк сесерлиинде Ак болгаш Ногаан Дарийгилерни, биче Будданың овур-хевирин болгаш авыралдыг күштер мөөңнеттинген Субурганны чурттакчы чоннуң деткимчези-биле бо хүннерге чедир тургускан.