Дүүн Баян-Колдуң тевелерин кыргаан
Апрель 30-де Кызыл кожууннуң Баян-Кол сумуга теве кыргыыр байырлал болуп эрткен.
Чаңчыл болган фестивальды ыяап-ла Май 1-ниң байырлалының бүдүүзүнде эрттирип турар. Көрүкчүлер саны чылдан чылче өзүп турар.
Бо чылгы байырлалдың хүндүлүг аалчызы – Дээди Хуралдың Даргазы Кан-оол Даваа болган. Ол хемчегниң организакчыларынга болгаш киржикчилеринге байыр чедиргеш, чоннуң чаагай чаңчылдарының сагылгазы амыдыралга чугулазын демдеглээн. Шынап-ла, көшкүн чоннарда мал азыралы-биле холбашкан онза чаңчылдар элбек.
Теве кыргылдазы – теве ажыл-агыйында амыр эвес ажыл болуп турар. Тевени чүгле чыттырып алгаш кыргыыр. Ону ужурарда алдыдан эвээш эвес санныг шыырак, дуржулгалыг эр херек.
Бо байырлалда теве чарыжы, ыры-шоорлуг концерт база болуп эрткен.