Бөгүн тыва эки турачыларга төөгүлүг сактыышкынның болгаш алдар-хүндүнүң хүнү
Сентябрьниң 1-ниң хүнү – республиканың чонунга Тыва эки турачыларга төөгүлүг сактыышкынның болгаш алдар-хүндүнүң хүнү.
Бөгүнгү хүн биске ийи дакпыр байырлал болур – 80 чыл бурунгаар тыва эки турачы эскадрон фронтудан ээп чанып келген турган.
Ада-чурттуң Улуг дайыны бистен ырап бар чоруур. Ынчалза-даа дайынчы камгалакчыларывыска, тылга арткаш кызымак күш-ажылы-биле Тиилелгени хүнден хүнче чоокшуладып турган өгбелеривиске мөгейиг чулавыс оду кажанда-даа өшпес. Бисти ынчалдыр ада-иевис кижизидип каан, а бистер ажы-төлүвүстү база ынчаар кижизидип чоруур бис.
Ада-чурттуң Улуг дайыны кижи төрелгеттенинге улуг өөредиг болган. Халаптыг дайын деп чүве биске кажан-даа катаптаттынмас боор деп санап чордувус. Ындыг-даа болза, амыдырал өске болду. Ада-чурттуң Улуг дайынының төөгүзүн боттарынга таарыштыр эде бижип, ону хажыдып чоруур чурттар көвүдээн. Ол оралдажыышкыннарындан дөмей-ле чүү-даа үнмес. Бистиң өгбелеривиске хүндүткеливис, Төрээн чуртувуска бердингенивис, эрткен маадырлыг оруувусче көрүжүвүс өскерилбээн – быжыг быра болуп арткан. Бистиң күжүвүс – төрээн чуртувуска хандыкшылда. Ындыг турган, ындыг турар-даа!
Амгы үеде хөй санныг эрес-дидим дайынчыларывыс, ада-өгбелеривистиң барык 80 чыл бурунгаар биске чаалап берген Тиилелгезин тускай шериг операция девискээрлеринде төлептии-биле катап камгалап турар. Төрээн чуртунуң мурнунга хүлээлгезин күүседип тургаш, амы-тынындан маадырлыы-биле чарылган дайынчыларывыс база бар. Оларның өг-бүлелеринге, ада-иезинге, чоок кижилеринге ханы кажыыдалывысты илередип чоруур бис. Маадырларывыс бистиң чүректеривиске мөңгеде артар. Удавас оларга тускай Тураскаалдыг шөл Кызылга ажыттынар.
Тыва эки турачыларга төөгүлүг сактыышкынның болгаш алдар-хүндүнүң хүнү-биле!