Эрзин кожууннуң Качык сумузу 30 чыл оюн демдеглээн
Качык суму 1994 чылда тургустунган. 1941 чылда бо черлерге 5 арбан – 450 хире кижи тускай суму тургузуп чурттап чораан. Ол үеде колхозтажыышкын эгелээн соонда, сумуну дүжүрген турган. Ынчалза-даа эрес-кежээ качыкчылар таптыг-ла 30 чыл бурунгаар бодунуң тыны тудуш сумузун катап тургускан.
Солун төөгүлүг Качык сумунуң 30 чыл ою-биле Тыва Республиканың Дээди Хуралының (парламентизиниң) өмүнээзинден байырны Национал, аныяктар политиказының, спорт, туризм болгаш үндезин эвээш санныг чоннар херектериниң талазы-биле хораазының даргазы Саян Ондар чедирген.
«Ырак-узак, кыдыг-кызыгаар черде чурттап чорза-даа, качыкчылар боттарының кызымак, онза ажыл-ижи-биле сурагжаан. Келир үеже, чаа амыдыралче чүткүлдүг сумунуң келир үези кедилиг.
Республиканың-даа, кожууннуң-даа чагырга черлери Качык сумунуң чурттакчыларынга амыдырап-чурттаарынга таарымчалыг байдалды тургузар дээш элээн хөй ажылдарны сөөлгү чылдарда кылган. Бо чайын Качыктың школазынга болгаш уруглар садынга улуг хемчээлдиг септелге ажылдары база чоргустунган», – деп, Саян Ондар демдеглээш, Качыктың чурттакчыларынга кадыкшылды, амыр-тайбың амыдыралды, а сумуга быжыг сайзыралды күзээн.
Оон ыңай Дээди Хуралдың депутады шылгараан качыкчыларга парламент шаңналдарын, а сумунуң чагыргазынга акша сертификадын берген.