Депутат Аяс Донгак Аксы-Барлыктың септеттинген клувунуң ажыдыышкынынга киришкен
Октябрь 26-да Барыын-Хемчик кожууннуң Аксы-Барлык суурнуң Херел Күжүгет аттыг чаартынган Культура бажыңын байырлыг байдалда ажыткан.
Ону «Культура» национал төлевилел-биле кылып дооскан. Дээди Хуралдың Даргазы Кан-оол Давааның даалгазы-биле депутат Аяс Донгак тыва парламентизиниң мурнундан байыр чедирген.
«Аксы-Барлыктың эп-найыралдыг, талантылыг чону чараш оюн-тоглааларын эрттирер, солун концерттерин көргүзер септеп-селиттинген оран-савалыг болганы өөрүнчүг. Сумунуң чылыг, чырык Культура одаанда чогаадыкчы бөлгүмнерге таарымчалыг байдалдар тургустунган. Аксы-барлыкчылар чараш Культура бажыңын мурнунда чылдарда ышкаш ээнзиретпейн эдилээринге бүзүреливис улуг» деп Кан-оол Давааның чоруткан байырлыг бижиинде демдеглеп турар.
Аяс Донгак аксы-барлыкчыларга аас-кежикти, кадыкшылды, чаа Культура одаанга янзы-бүрү солун оюн-тоглааларны, концерт-көргүзүглерни күзээш, бөлүк культура ажылдакчыларынга Дээди Хуралдың шаңналдарын тывыскан.