Кызылга политиктиг репрессияга таварышканнарга тураскаал хүннү демдеглээн
Бөгүн Политиктиг репрессияларга когараан улуска тураскаал хүннү чуртувус 33 дугаар чыл демдеглеп турар.
Бо кажыыдалдыг хүнде Кызылда Чагыртпаан араттың тураскаалының чанында репрессияга таварышканнар шөлүнге эрткен митингиге Дээди Хуралдың депутады Буян Биче-оол киришкеш, сөс ап, чүве чугаалаан.
«Республика девискээринге 1930, 1940-1953 чылдарда болуп турган политиктиг шаажылалдар чурттакчы чонга кончуг аар, берге байдалга эртип турган. Репрессия чылдарында бүгү Тывага муң ажыг кижи актыг черге туттурган болгаш хоругдаттырган. Ол-ла үелерде политиктиг шаажылалдың бир хевири – шөлүлгеге барык он чеди муң кижи таварышкан. Эвээш санныг чурттакчылыг республикага ол карак чажы долган човулаңныг, элег-түреглиг үе болган» - деп, депутат чугаалаан.
Буян Биче-оол шаажылаткан улустуң аразында чүгле тывалар эвес, а өске аймак-сөөк улустар база барын демдеглээш, оларның төөгүзүн өөренип, оларга мөгейип чоруурунче кыйгырган.