Тывага Дыл политиказының талазы-биле күрүне чөвүлелиниң хуралы болуп эрткен
Ужуражылга Тываның Баштыңы Владислав Ховалыгның удуртулгазы-биле эртем-башкы ниитилелдериниң болгаш өске-даа хөй-ниити организацияларының төлээлериниң киржилгези-биле эрткен. Хуралга Өөредилге, культура болгаш информастыг политика талазы-биле хорааның даргазы Белекмаа Мунге, депутаттар Аяна Монгуш, Чалым Чулдум-оол болгаш Ролан Ооржак киришкен.
Тываның Баштыңы ноябрь 1-де демдеглеп турар Тыва дылдың хүнүнүң чугулазын онзалап демдеглеп, дыл политиказын өөредилгениң, культураның болгаш эртемниң регионалдыг программаларынче киирериниң чугулазын айыткан. Ол ышкаш Тываның улустуң чогаалчызы, Тыва дыл хүнүн тургузарының эгелекчизи Александр Даржайның төрүттүнгенинден бээр 80 чыл ою чоокшулап орарын база демдеглээн.
Ол ышкаш Тыва Республикага 2024-2033 чылдарда тыва дылдың хөгжүлдезинге күрүне деткимчезиниң эчис сорулгаларын база чугаалашкан. Ооң бир кезээ кылдыр дылды чурагай аргазынче шилчидер талазы-биле улуг ажылдар кылдынган: «Яндекс.Клавиатура» сервистеринге тыва дыл немешкен, кылымал угаанга үндезилеттинген онлайн-очулдурукчуну тургузуп турар. Оон аңгыда чыл төнчүзүнде школалар тыва дыл болгаш чогаалдың чаа өөредилге номнарын Владислав Ховалыгның айтыышкыны-биле алыр.
База бир тема – республикада күрүне дылдарының шын ажыглалы. Тываның гуманитарлыг болгаш ажыглалдыг шинчилелдер институдунуң эртемденнери Кызылдың кудумчуларында сөзүглелдиг информацияларны шинчилээш, орфографтыг чурум үрээшкиннерин тодараткан. Владислав Ховалыг 2025 чылдың сентябрьга чедир оларны эдерин база албан-хаакчыттар аразынга өөредилгени организастаарын дааскан. Ол ышкаш тыва дылда эртем-популярлыг ажылдар дээш национал шаңналды тургузарын деткээн.