Тыва дылдың хүнү-биле республиканың чурттакчы чонунга Дээди Хуралдың депутаттары байыр чедирген
Хүндүлүг чаңгыс чер чурттугларывыс!
Бистер, Тыва Республиканың Дээди Хуралының (парламентизиниң) депутаттары, силер бүгүдеге Тыва дылдың хүнү-биле байыр чедирип тур бис!
Дыл – чоннуң бот-тускайлаң, онзагай чоруунуң үндезини, кол демдээ болгаш сагыш-сеткилиниң илередикчизи. Бистиң дылывыс ниити түрк уктуг болза-даа, чүс-чүс чылдар дургузунда кожа-хелбээ чурттап чоруурувус орус, моол чоннарның дылдарындан база хөй сөстерни үлегерлеп алгаш, өскелерге дөмейлешпес чараш дылды хевирлеп тургускан.
Тыва улус үе-дүптен бээр байлак культуралыг, онзагай төөгүлүг, чечен-мерген дылдыг. Өгбелеривис дылының дузазы-биле бодунуң салгалдарын эки мөзү-бүдүштүг, төрээн черинге болгаш чонунга бердинген төлептиг кижилер кылдыр кижизидип чораан. Ол дээрге чүс-чүс чылдар дургузунда хынаттынган күш-түр. Дылывыстың сөскүрүн, чаражын, байлаан чүгле ону хүн бүрүде ажыглап чоруур кижи билир.
Бо чараш национал каттыжылга – Тыва дылдың хүнү-биле өг-бүлеңерге аас-кежикти, ажыл-агыйыңарга чедиишкиннерни күзеп тур бис!