Бөгүн Кызылда Улусчу чогаадылга бажыңынга 9 дугаар гимназияның 35 чыл оюн демдеглээн байырлыг хурал болган
Дээди Хуралдың Даргазы Кан-оол Давааның даалгазы-биле депутат Биче-оол Буян школаның найыралдыг коллективинге болгаш хоочуннарга байыр чедирген.
«Гимназия эге чылдардан-на республиканың кол, шыырак школаларының санынче кире берген. Чүге дизе, башкылар коллективи өске школалардан ажылдап келген арга-дуржулгалыг башкылардан тургустунган турган. Оларның аразындан Николай Энчек-Кулакович Ооржакты, Валентина Өдүрековна Дөмүр-оолду, Зоя Олеговна Донгакты, Хүрен Бораевна Ооржакты, Опеймаа Кунгааевна Ховалыгны, Светлана Чоодуевна Шулуу-Маадырны дээш, өскелер-даа демдеглеп болур.
Гимназия өөредилге-кижизидилге ажылынга чаа, мурнакчы аргаларны баштайгы чылдарындан-на шенеп, ажыглап эгелээн. Ажыл-чорудулгазын тыва улустуң чаңчылчаан культуразынга үндезилээн мөзү-шынар кижизидилгезинче хөй чылдар дургузунда угландырып турар. Эки түңнелдер бар. Башкыларның бедик мергежилиниң, мерген угаанының болгаш шыдамык чоруунуң ачызында муң-муң уруг-дарыывыс республиканың, а харын-даа чурттуң төлептиг хамаатылары болган» - деп, Буян Биче-оол чугаалаан.
Депутат чугаазының төнчүзүнде гимназияның башкыларынга, хоочуннарынга болгаш өске-даа ажылдакчыларынга кадыкшылды, аас-кежикти болгаш ажылынга чедиишкиннерни күзээн!