Верховный Хурал (парламент) Республики Тыва

Официальный сайт search.png   vkontakte   телега_1711971983493-1711971987606.png

Дээди Хуралдың депутады Ролан Ооржак Тываның чогаалчыларының съездизинге киришкен

15 декабря 2024 - 19:25

Ролан Ооржак декабрь 13-те Тываның чогаалчыларының XXVII съездизинге киришкеш, ТР-ниң Дээди Хуралының Даргазы Кан-оол Давааның мурнундан байыр чедирген.

«Силер чогаалдарыңар-биле хөй улустуң бодалдарын болгаш угаан-медерелин хевирлеп тургуспушаан, оларның өртемчейже көрүжүнге салдар чедирип турар силер. Күштүг сөс чүректиң согуун, угаанның шапкынын өскертип болур. Чараш чечен домак кижиниң хей-аъдын көдүрүп шыдаар, амыдыралга сонуургалын оттуруп болур.

Чогаалчы кижи дээрге, хайгааракчы кижи-дир. Ол бодунуң үезиниң негелделерин, бодалдарын болгаш муңгаралдарын дидими-биле илередип шыдаар арга-шинектиг. Силерниң сөстериңер чурттап чоруур үеңер үнү болу берип болур. Ынчангаш чогаалыңар бүрүзүнде, домааңар бүрүзүнде чоннуң аңгы-аңгы үзел-бодалдарын оттуруптар күш бар.

Чогаалчы кижи дээрге, чүгле сөс мастери эвес, а онза бодалдарны саазынга чыскааптар архитектор-дур. Чечен чогаалдарны ажыдып, номчуп олургаш, кижи онзагай делегейже аян-чорукту кылыр. Оларның маадырлары бистиң өңнүктеривис болу бээри база чажыт эвес» деп байыр чедириишкининде чугаалап турар.

Депутат Ролан Ооржак эки дээн бөлүк чогаалчыларга тыва парламентиниң шаңналдарын тывыскан.


Возврат к списку