Мөңгүн-Тайга кожууннуң шаңналы дээш эрткен тыва хүреш маргылдаазын Дээди Хуралдың депутаттары деткээн
Дүүн, декабрь 24-те, Сүбедей аттыг спорт ордузунга Мөңгүн-Тайга кожууннуң шаңналы дээш тыва хүреш болуп эрткен. 2024 чылдың кожууннар хүрежин мөңгүн-тайгажылар бо маргылдаа-биле хагган.
Баштай бедик мөге ат чок 110 кижи хүрешкен. Шыырак улуг мөгелер салыгларынга 74 кижи киришкен. Тываның Чаан мөгези Сайын-Белек Түлүш шүүлген, а Хартыга мөге Начын-Мерген Ооржак үжүүрлешкен.
ТР-ниң Дээди Хуралының депутаттары Ульяна Монгуш биле Ужар-оол Иргит боттарының мурнундан эки хүрешкен дөрт мөгеге акша шаңналдарын тывыскан. Дээди Хуралдың Даргазы Кан-оол Даваа – маргылдааның хүндүлүг аалчы, маргылдааның киржикчилеринге болгаш аарыкчыларга байыр чедиргеш, шаңналдар тыпсыр ёзулалга киришкен.
2025 чылда кожууннар хүрежин Бай-Тайга январь айда эрттирер.