ТР-ниң Дээди Хуралының депутады, Хөөмейжилер эвилелиниң удуртукчузу Аян Ширижик Тываның Чазааның 2024 чылда ажыл-чорудулгазының түңнелдериниң дугайында
– Бөгүн Владислав Товарищтайович Ховалыгның 2024 чылда Тыва Республиканың Чазааның кылган ажылын түңнээн отчеду-биле таныштывыс. Культура адырының хөгжүлдезинге тураскааткан бөлүктү онза кичээнгейлиг номчудум.
Тываның Хөөмейжилер эвилелиниң удуртукчузу болганымда, Кызылдың уран чүүл колледжинге «Хɵɵмей» деп тускай мергежилди кииргенинге онза өөрүп, четтиргенимни илередип тур мен. Ук мергежилди дооскан кижи күрүне чергелиг дипломну алгаш, хɵɵмей башкызы, чогаадыкчы коллективтиң удуртукчузу болуп боор. Бо дээрге бистиң үндезин уран чүүлүвүстүң хөгжүлдезинге улуг үлүг-хуу-дур.
База ол ышкаш Тывага эрткен чылын делегей чергелиг фестивальдар чедиишкинниг эрткен. Ооң иштинде бистиң 1-ги «Алаш Фест» хөгжүм фестивалы, «Үстүү хүрээ» деп дириг хөгжүмнүң болгаш чүдүлгениң делегей чергелиг фестивалы, «Азия тɵвүнде хөөмей» делегей чергелиг фестиваль.
Культура адырының инфраструктуразын чаартырынче эрге-чагырга онза кичээнгейни салып турарынга база өөрүп тур мен. 2024 чылда 17 албан черинге капиталдыг септелгелерни чоруткан, «Сорунза» төлевилелдиң ачызында Бояровка суурга культура төвүн, Хову-Аксыга библиотеканы туткан. 16 библиотека долузу-биле чаартынган. 2024 чылда «Культура» национал төлевилелдиң дузазы-биле чаарттынган библиотекаларның саны-биле Тывавыс Россияда мурнакчы черни ээлээн.
Ол дээрге Тываның культура адырында эки чедиишкиннер-дир деп санаар-дыр мен.