Сүт-Хөлде – Чазак отчёду
Апрель 18-19 хүннеринде Тыва Республиканың Чазааның эрткен 2024 чыл дургузунда кылып чоруткан ажылының түңнелдерин таныштырары-биле тускай ажылчын бөлүк-биле Сүт-Хөл кожуунче үнүүшкүн кылып, чогуур ажылды кылып чоруттувус.
Бөлүк ийи чарлып алгаш, бир дугаар хүнде сумуларже үнүүшкүн болган. Бистиң бөлүүвүс Ишкин, Кызыл-Тайга болгаш Кара-Чыраа сумуларынга четкен.
Өске бөлүк Бора-Тайга, Ак-Даш болгаш Алдын-Маадыр чонунга четкен. Апрель 19-та Сүт-Хөл кожууннуң төвү Суг-Аксынга ниити бөлүүвүс биле база чон биле ужуражылганы кылып чоруттувус.
Тывавыстың Чазааның 2024 чылда ажылын таныштырбышаан, чонну дүвүредип чоруур чидиг айтырыгларын демдеглеп бижип алгаш, ол айтырыгларга хамаарылгалыг яамылар дораан харыылапкы дег айтырыгларын дораан тайылбырлап чугааны кылдылар.
Орук чаартылгазы, чаа школалар тудуу, школа болгаш уруглар садтарының капиталдыг септелгези, эрик камгалалы болгаш часкы, чайгы суггат системазы, аныяк специалистерге көдээ черлерге артып ажылдаарынга таарымчалыг байдал болгаш деткимчени көргүзери дээш оон-даа хөй айтырыгларны сүт-хөлчүлер аажок сагыжы аарып турары илдең чугаалап, келген бөлүк биле ажыт чажыт чок чугааны кылып, айтырыгларын бижидип алдылар. Тыва Чазаавыстың 2024 чылда ажылын таныжып дооскан соонда, чуртувуста хөй-ле ажыл кылдынып турарын чон онзазы-биле демдеглеп, түңнелдерин деткип ам-даа чедиишкиннерни күзедилер.