Кызыл-Чыраа школазының 75 чыл оюнда Дээди Хурал байыр чедирген
Тес-Хем кожууннуң Кызыл-Чыраа ортумак школазы 75 чыл оюн апрель 18-те демдеглеп эрттирген.
Байырлалга Дээди Хуралдың депутады Роберт Доржу киришкеш, школаның коллективинге болгаш хоочуннарынга тыва парламентиниң Даргазы К.Т. Давааның мурнундан байыр чедирген.
«Школаның чедиишкиннери өөредилге-кижизидилге ажылында чаа аргаларны ажыглап турарындан кончуг хамааржыр. Бо талазы-биле Кызыл-Чыраа ортумак школазы үениң негелдезинден чыда калбайн чоруур. Школаның чамдык башкылары – республика болгаш кожуун чергелиг чогаадыкчы мөөрейлерниң тиилекчилери. Оларның бедик мергежилиниң, мерген угаанының болгаш шыдамык чоруунуң ачызында муң-муң доозукчу республиканың, а харын-даа чурттуң төлептиг хамаатылары болган» – деп, Роберт Дермеевич байырлыг хуралга чугаалаан.
Депутат байырлыг хүнде башкыларга чаа-чаа чедиишкиннерни, а өөреникчилерге эки өөредилгени күзээш, школаның бөлүк башкыларынга Дээди Хуралдың Хүндүлел бижиктерин тывыскан.