«Шын» солун 100 чыл оюн бөгүн демдеглээн
Республиканың парлалга ажылдакчыларының, номчукчуларның, хөй-ниитиниң «Шын» солуннуң 100 чыл оюнга тураскааткан байырлыг хуралынга ТР-ниң Баштыңы Владислав Ховалыг, Дээди Хуралдың Өөредилге, культура, эртем болгаш национал политика талазы-биле хораазының даргазы Белекмаа Мунге, яамыларның база организацияларның удуртукчулары, журналистер, чогаадыкчы эвилелдерниң кежигүннери, хөй-ниитиниң төлээлекчилери болгаш аалчылар бөгүн, сентябрь 4-те, Кызылда Республиканың Улусчу чогаадылга бажыңынга чыглып келгеннер.
Россия биле Тыва Республиканың сүлде ырлары байырлалдыы-биле чаңгыланган соонда, хурал эгелээн. ТР-ниң Баштыңы Владислав Ховалыг «Шын» солуннуң бөлүк хоочуннарынга болгаш амгы ажылдакчыларынга республика шаңналдарын, а редакцияга «Лада-Веста» автомашинаны алыр сертификатты тывыскан.
Юбиляр солунга Дээди Хуралдың Даргазы Кан-оол Давааның байыр чедирген бижиин Белекмаа Мунге номчаан. Ында мындыг одуруглар бар: «Шын» солун амыр эвес узун орукту эртип чоруур. Чүс чылдың иштинде республика, ооң иштинде тыва культура болгаш тыва дыл, дыка сайзыраан. Солунга экономика, өөредилге, культура, спорт, мөзү-шынар темаларга айтырыглар хөйү-биле чырыттынып турар. Үндезин тыва чон ортузунга бо бүгү эки чүүлдерниң могаг-шылаг чок тарадыкчызы, суртаалчызы – «Шын» солун. Ол Тываның хөгжүлдезиниң алдын үезин республиказы-биле кады чурттап эрткен: муң-муң солун чүүлдерни тыва парлалгага, а ынчап кээрге, төөгүге кадагалап арттырган.
Солунувус – тыва кижиниң сагыш-сеткилиниң көрүнчүү. Номчукчулар боттарының чедиишкиннерин, өөрүшкүлерин, амы-хууда бодалдарын, шүгүмчүлелдерин ынак солунунга чырыдып чоруур. Ону «чоннуң индири» деп турганында утка бар. Чүс чыл дургузунда солуннуң күжү кызыгаар чок турган.
Редакцияга Тываның дээре дээн журналистери болгаш чогаалчылары аңгы-аңгы чылдарда ажылдап чораан. Ол хөй кижини журналистиканың, уран чогаалдың, эртем-шинчилелдиң улуг оруунче үдээн.
«Шын» солун тыва дылды кадагалап арттырарынга, ону сайзырадырынга канчаар-даа аажок улуг рольду ойнап чоруур. Ооң ачызында ава дылывыска янзы-бүрү чүүлдерни номчуп чоруур аргалыг бис. Солун өртемчейже бистиң көрүүшкүнүвүстү, төрээн черивиске ынакшылывысты быжыглап хевирлээн».
Белекмаа Мунге байырлыг чугаазын доозуп тургаш, «Шынның» ажылдакчыларынга болгаш хоочуннарынга чогаадыкчы чедиишкиннерни күзээш, солун моон-даа соңгаар тыва дылдыг номчукчунуң шынчы өңнүү болгаш сүмелекчизи болуп артар болзун!» деп йөрээген.
Депутат бөлүк «шынчыларга» болгаш солуннуң хоочуннарынга тыва парламентиниң шаңналдарын база тывыскан. Байырлыг хурал үезинде ооң киржикчилеринге Тываның филармониязының артистери солун концерт көргүскен.