Арыг-Бажы сумунуң «Хүннээрек» уруглар сады алдан беш чыл оюн демдеглээн

10 октября 2025 - 16:27

Дээди Хуралдың депутады Буян Биче-оол бөгүн, октябрь 10-да, Улуг-Хем кожууннуң Арыг-Бажы сумузунуң «Хүннээрек» уруглар садының 65 чыл оюнга тураскааткан байырлыг хуралга киришкен.

Депутат чыылганнарга тыва парламентиниң Даргазы Кан-оол Давааның байыр чедириишкинин таныштырган. Ында мындыг сөстер бар: «Хүннээректиң» ачы-буян бодараткан алдан беш чылының дургузунда уруглар садынга чүс-чүс чаштар кижизиттинген. Амгы үеде безин ол хөй чаштарны ортумак школага белеткеп, кижизидип турар. Улуг эвес-даа болза, эптиг-найыралдыг коллективтиң кежигүннери болгаш ада-иелер Аида Леонидовна Хуурак-оолдуң, Саида Намажаевна Доспанның, Роза Аңчыевна Доспанның, Алевтина Шивитовна Балданайның дээш, өскелерниң-даа ажыл-ижин хүндүлээр болгаш бедии-биле үнелээр».

Буян Биче-оол чаштарның чылыг, чырык уязы болур «Хүннээрек» уруглар садының кижизидикчи башкыларынга болгаш ажылчыннарга чогаадыкчы чедиишкиннерни, амыр-тайбың амыдыралды, аас-кежикти күзээш, шылгараан ажылдакчыларга Дээди Хуралдың шаңналдарын тывыскан.

Возврат к списку