Тыва хүрешке Ак-Довурак хоорайның шаңналдары дээш маргылдааларга эрзинчилер шүүлген
Бөгүн «Сүбедей» спорт залга тыва хүрешке Ак-Довурак хоорайның шаңналы дээш улуг болгаш аныяк мөгелер аразынга маргылдаа болуп эрткен.
Тыва Республиканың Дээди Хуралының (парламентизиниң) Даргазы Кан-оол Даваа биле Дээди Хуралдың Аныяктар, информастыг политика, күш-культура болгаш спорт, хамааты ниитилелдиң институттарының хөгжүлдезиниң талазы-биле хораазының даргазы Аяс Донгак маргылдааның хүндүлүг аалчылары болган.
«Тыва эр кижиниң күчү-шыдалын болгаш эрес-кашпагайын шаг-шаандан бээр хүрештерге илередип чораан. Ынчангаш көшкүн чоннар аразында национал хүрештерниң нептереңгей чүвези ол» - деп, Кан-оол Даваа маргылдааның байырлыг ажыдыышкынында чугаалаан.
Спикер бөгүн чуртувуста Адалар хүнүн демдеглеп турарын база утпаан. Ынчангаш эр хиндиктиг аарыкчыларга, оларның оолдарынга болгаш кырган-ачаларга Дээди Хуралдың депутаттарының мурнундан база байыр чедирген. «Тыва адалар аразында төрээн чурттун камгалап чоруур эрес-дидим дайынчылар, спортчулар, уран чүүл ажылдакчылары дээш кымнарны чок дээр. Бистер оларга чоргаарланыр бис, оларга даянып чоруур бис!» деп спикер чугаалаан.
Аныяк мөгелер аразынга Максим Ооржак (Эрзин кожуун) шүүлген, а Түмен Монгуш (Чеди-Хөл кожуун) үжүүрлешкен. Улуг мөгелер аразынга Тываның хартыга мөгези Калин-оол Соруктуг (Эрзин кожуун) шүүлген, а база бир хартыга мөге Кайгал-оол Ондар (Сүт-Хөл кожуун) үжүүрлешкен. Дараазында ай хүрежин Тес-Хем кожуун хүлээнип алган.