Депутат Аяс Донгак Ак сумуга чораан
Композитор Кара-Кат Очур-оолович Ооржактың адын Ак сумунуң көдээ Культура бажыңынга тывыскан байырлыг хуралга Дээди Хуралдың Аныяктар, информастыг политика, күш-культура болгаш спорт, хамааты ниитилелдиң институттарының хөгжүлдезиниң талазы-биле хораазының даргазы Аяс Донгак октябрь 31-де киришкен.
Депутат Аяс Донгак К-К.О. Ооржак республикага билдингир, кылбас-тутпас чүвези чок кижи чораан деп чугаалаан. Ол «үжен чыл бурунгаар Тыва Республиканың Дээди Хуралының бирги чыыжының депутадынга соңгуткаш, Кызыл кожууннуң чонун парламентиге төлептиг төлээлээн. Хүрешке Россияның спорт мастери атты чаалап алган чораан, а хөгжүм херекселинге өөреткен уруглары мырыңай эңдерик.
Кара-Кат Очур-оолович культурлуг мөөрейлерниң болгаш хөй-хөй спортчу маргылдааларның тиилекчизи чораан. Бодунуң тура-соруктуг, туруштуг, хөй-ниитичи, эш-өөржү болгаш идепкейжи чоруу-биле чонунга хүндүткелдиг, а аныяк-өскенге үлегерлиг кижи апарган турган» – деп, депутат чугаалаан.
Байырлыг хемчег үезинде чогаадыкчы мөөрейлер болуп эрткен.