Шагаа-2026-биле!
Хүндүлүг чаңгыс чер чурттугларывыс!
Бо хүннерде төрээн Тывавыста эң нептереңгей сөс «Шагаа-биле!». Ону республикада булуң бүрүзүнден дыңнап болур. Бо чараш күзээшкин бедик ужугуп, тайгаларда болгаш ховуларда чаңгыланып, бистиң хей-аъдывысты бедик көдүрүп турар.
Үнүп орар от олуттуг кызыл Аът чылынга идегеливис улуг. Мурнувуста экономиктиг, культурлуг болгаш шажынчы улуг сорулгалар салдынган. Оларны боттандырар күзел болгаш күш-шыдал республикада бар.
Бурунгаар хөгжүлдени хандырып шыдаан эрткен чылче чоргааралдыг хая көрнүп чоруур бис. Социал-экономиктиг сайзыралды хоорай-суурларда улуг-биче тудуглар, өөредилге, культура болгаш спорт адырларында хөй санныг чедиишкиннер херечилеп турар. Депшилгелиг ажылдар моон-даа соңгаар уламчылаар.
Бөгүн бистер, ТР-ниң Дээди Хуралының (парламентизиниң) депутаттары чонувус силер-биле чолукшуп, ал-бодуңарга аас-кежикти, аал-ораныңарга амыр-тайбың амыдыралды, ажыл-ижиңерге чогаадыкчы чорукту күзеп тур бис!