Суг-Аксы суурга Ада-чурт камгалакчыларының чылын хагган болгаш Россияның Чоннарының чаңгыс деминиң чылын ажыткан
Март 3-те Сүт-Хөл кожууннуң Суг-Аксы суурга Ада-чурт камгалакчыларының чылын хагган болгаш Россияның Чоннарының чаңгыс деминиң чылын ажыткан байырлыг хемчег болуп эрткен.
Ооң ажылынга ТР-ниң Дээди Хуралының Аграр политика, чер харылзааларының, бойдус ажыглалының, экология болгаш эвээш санныг үндезин чоннар херектериниң талазы-биле хораазының даргазы, ТШО-нуң киржикчизи Айдыс Куулар киришкен. Депутат Сүт-Хөл кожуун – маадырлар чурту деп чүвени онзалап демдеглээш, Ада-чурт камгалакчыларының чылында республикага, ооң иштинде кожуунга хөй санныг солун төлевилелдер боттанганын демдеглээн.
Айдыс Куулар Сүт-Хөл кожууннуң тулган дээн волонтерларынга Дээди Хуралдың «ТШО-га дузазы дээш» деп медальды болгаш тыва парламентиниң Даргазы Каң-оол Давааның Өөрүп четтириишкин бижиктерин тывыскан.