Бөгүн Тыва дыл хүнү
Хүндүлүг чаңгыс чер чурттугларывыс!
Бөгүн республиканың үндезин чонунуң онзагай байырлалы – Тыва дыл хүнүн демдеглеп турар бис. Ону анаа тургузуп кагбаан. Бо дээрге бистиң өгбелеривис-биле сырый харылзаавыстың, салгалдан салгалче дамчыдып берип чоруур байлак культуравыстың демдээ-дир.
Төрээн дылывыс бистерни өгбелеривис-биле, оларның мерген угаадыглары-биле, чонувустуң өскелерден ылгалып турар талалары-биле харылзаштырып чоруур.
Дыл – чүгле кижилер аразында харылзаа чепсээ эвес-тир. Ол дээрге чоннарның өртемчейже көрүүшкүнүнүң, философиязының база төөгүзүнүң илередии-дир. Бистиң төрээн дылывыс онза уянгылыг, ону чер-черлер аайы-биле диалектилерден эскерип болур. Тыва дылга кижиниң сагыш-сеткилиниң байлаан, угаан-бодалының чаражын белени-биле илередип болур. Дылывыста оран-черивис чараш каазы, чаңчылдарывыс күчү-күжү, чонувус хөөнү сиңниккен.
Амгы үеде делегей дыка өскерлип, ниитижип турар. Ынчангаш төрээн дылының камгалалы ооң эдилекчилеринге онза чугула черни ээлеп турар апарган. Дылдың камгалалы – эрткен үениң мурнунга хүлээлгевис, а келир үеже салыышкынывыс болур. Тыва кижи бүрүзү дылывыстың камгалалы, келир үези болгаш хөгжүлдези дээш харыысалгалыг болур ужурлуг. Бистиң ажы-төлдеривис төрээн дылынга чоргаарал-биле чугаалап, ооң чаражын магадып, ажыглап чоруур кылдыр ажылдаар бис.
Тыва дыл хүнү – биске дылывыстың үнезиниң дугайында боданыр чылдагаан болзун. Аңаа ынакшылывыс быжыг чорзун. Тыва дылдың эдилекчизи кижи бүрүзүнге кадыкшылды, менди-чаагай чорукту, а ол ышкаш эң үнелиг дылывысты чырык черге сайзырадырынга, салгалдарга камгалап арттырарынга чедиишкиннерни күзедим!