Чаан мөгелерниң шаңналы дээш
Бөгүн, ноябрь 3-те, «Сүбедей» спорткомплекске Тыва Республиканың Чаан мөгелери Андрей Хертек, Эрес Кара-Сал болгаш Сайын-Белек Түлүштүң шаңналдары дээш 1999 чылдан 2010 чылга чедир төрүттүнген оолдар аразынга тыва хүреш маргылдаазы болуп эрткен.
Маргылдааның байырлыг ажыдыышкынынга Тыва Республиканың Дээди Хуралының (парламентизиниң) Даргазы К. Даваа аныяк мөгелерге бүгү-ле экини, бедик чедиишкиннерни, Тываның адын делегейге камгалап хүрежир улуг мөгелер кылдыр өзүп келирин күзээш, Тывавыстың өзүп орар аныяк мөгелеринге улуг деткимчени кылып, бичии оолдар аразынга хүрешти эрттирип турары дээш Тываның Чаан мөгелеринге база катап өөрүп четтиргенин илереткен.
Маргылдаага ниитизи-биле барык 400 хире мөге киришкен.
Тиилекчилер болгаш чараш хүрежи-биле чоннуң сонуургалын чаалап алган мөгелер Тыва Республиканың улуг Чаан мөгелериниң шаңналдарын оларнын холдарындан ап, тураскаал кылдыр кады чурукка тыттырар аас-кежиктиг болганнар.