Верховный Хурал (парламент) Республики Тыва

Официальный сайт search.png   vkontakte   facebook   twitter

Дээди Хурал уруглар чогаалчызы, журналист А. Шоюнга байыр чедирген

11 ноября 2016 - 19:49

Бөгүн билдингир уруглар чогаалчызы, журналист Александр Сан-оолович Шоюн 60 харлаан юбилейинге тураскааткан чогаадыкчы кежээни Тываның Национал театрынга эрттирген. Аңаа чогаалчының хөй санныг эш-өөрү, чаңгыс чер-чурттуглары, ооң талантызының мөгейикчилери, чогаалчылар болгаш журналистер хөйү-биле чыылган.

Тыва Республиканың Дээди Хуралының депутаттары Ульяна Байыр-ооловна Монгуш биле Седен-Очур Павлович Кара-Сал олар юбилярга тыва парламентиниң мурнундан байыр чедиргеш, тускай бижикти тывыскан. Ында «Тыва журналистика алдарлыг орукту эрткен. Ооң төөгүзүнде Силерниң адыңар алдын үжүктер-биле бижиттинген. Алыс бодуңарның мергежилиңер артист болза-даа, тыва парлалганы, массалыг информация чепсектерин улам ыңай хөгжүдеринге улуг рольду ойнап чоруур силер. Силерниң уругларга ханы уткалыг, чараш чогаалдарыңар ажы-төлүвүстүң, ада-иелерниң болгаш башкыларның бедик үнелелин алган.

Хөй чылдарда «Тываның Журналистер эвилели» хөй-ниити организацияны, уругларның «Сылдысчыгаш» солунун, «Алдын-Кушкаш» сеткүүлдү үре-түңнелдиг удуртуп-баштап чорааш, чогаадыкчы эш-өөрүңерге, өзүп орар салгалывыска дыка хөй буянныг ажыл-херектерни кылган силер.

Амгы үеде республикада эң улуг болгаш хоочун «Шын» солунну удуртуп тургаш, чаа чогаадыкчы эгелээшкиннерни кылып турарыңар көскү. ТР-ниң Дээди Хуралы «Шын» солун-биле, Силер-биле кады ажылдажылганы моон-даа соңгаар күштелдирерин магадылап тур.

Бөгүн Силерге, тыва чогаалдың база журналистиканың хоочунунга, бедик хей-аътты, солун-солун төлевилелдерни, оларның боттандырылгазын, а ол ышкаш аас-кежикти, кадыкшылды күзедивис!» деп бижип турар.

Юбилярга республиканың барык бүгү массалыг информация чепсектери, тыва уран чүүлдүң ажылдакчылары, Кызыл хоорайның чагыргазының, Хуралының төлээлери, чаңгыс чер-чурттуглары байыр чедиргеннер.

Чогаадыкчы кежээни юбилярның эш-өөрү артистерниң күжү-биле белеткээн солун концерт улам аян киирген.


Возврат к списку