Дээди Хуралдың Даргазы Кан-оол Давааның Наадым-биле байыр чедириишкини
Хүндүлүг малчыннар болгаш чаңгыс чер чурттугларывыс!
Тыва чонувустуң бурун шагдан бээр ынак байырлалы – Наадымны таварыштыр Силерге Тыва Республиканың Дээди Хуралының (парламентизиниң) өмүнээзинден изиг байыр чедирерин чөпшээреп көрүңер!
Бо чылгы Наадымны республиканың чону улуг көдүрлүүшкүннүг уткуп турар. Алыс боду мал ажылдыг улустуң байырлалы болза-даа, ону дөмей-ле Тываның бүгү чурттакчылары калбаа-биле демдеглээри чаңчыл апарган.
Мал ажыл-агыйы – республиканың экономиказының кол адыры, үндезини. Республиканың эрге-чагырга органнары мал ажылын хөгжүдер дээш хүн бүрү ажылдап, мал азырап азы ону өстүрер сорулгалыг өг-бүлелерни каш янзы төлевилелдер-биле деткип турар. Оларның боттандырылгазы моон-даа соңгаар уламчылаар. Ындыг болганда, ол биске чүгле харыысалганы онаап турар эвес, а кызымак ажылга бедик хей-аъттыг болурувусче база кыйгырып турар.
Республиканың малчыннарының Наадым байырлалын таварыштыр силер бүгүдеге, ылаңгыя эрес-кежээ мал ажылдыгларга кадыкшылды, аас-кежикти болгаш төрээн Тывавыстың хөгжүлдези дээш кылып чоруур бүгү-ле ажылдарыңарга чедиишкиннерни күзедим!
Тыва Республиканың Дээди Хуралының (парламентизиниң) Даргазы К. Даваа